Skrining kanceri thula porjako

Akharipe te aves ando programo ačhavimasko thaj sigutne arakhavimasko e kancerosko e thule porresko

Ande srbija inćarelpe o nacionosko programi sigutne arakhavimasko e kancerosko e thule porresko ande savo si čhutine e manuša thaj e manušnja trajtoske katar 50 džikaj 74 berša.

Bare loćimaske testova šaj te araćhenpe e polipurja andar save šaj te ćerdolpe o kancero. Kasave testova si šajipe te araćhelpe o kancero ando teljaripe kana si o sastaripe šajimasko.

Sar si ande Srbija?

Sostar avel džiko kancero e thule porresko?

Čačune šaj te motholpe kaj o kancero či džanelpe sar ćerdol. Butimaske dži leste avelpe sar ko familijako genetikako faktori thaj faktori e bešimasko, naro e hamasko thaj trajtosko. Faktori bilačhimasko si vi o habe barvalo e lole maseja thaj džuvdimaske čićeneja, thuvaripe, alkoholi, thulipo thaj bizuralo truposko aktivipe. 

Ko šaj te nasvavol katar o kancero e thule porresko?

Katar o kancero e thule porresko šaj te nasvavol sa jekh, no vo si maj butimasko ke kola saven si maškar 50 thaj 74 berša e trajtosko bizo kolesko si manuš jal manušnji.

Save si siptomurja e kancerosko e thule porresko?

O nasvalipe lungo vrjama anglunil bi nesoske dukhavimatengo. Kana džike godova avel, o nasvalipe anglunisarda thaj buhlilo.

Majbutimaske simptomurja e kancerosko e thule porresko si:

• rataripe ando feceso
• arlimata ando čučaripe e porrengo
• dukha ando ođi
• carrarataripo
• hasaripe e truposke pharimasko

So si sigutno araćhipe e kancerosko e thule porresko?

Sigutno araćhipe (skriningo) kancerosko e thule porresko liparel o testo pale saste manuša, bi kolesko kaj silen siptomo  thaj nišani nasvalimasko, ando reso arakhadimasko e arlimatengo, majsigo e polipurja, andar save ćerdolpe o kancero, jal kancero ando teljaripe.

Polipurja si binasvalimaske gunke ando andralunipe e porrengo. Ande nesoske polipurja e vrjamava šaj te ćerdonpe e bilačhe arlimata. E vrjama kana naćhelpe andar e lačhe džike bilačhe arlimata si beršenca. Lačhevrjamako arakhadipe thaj inkaldipe e poliposko majsigo no so ande lende ćerdonpe e bilačhe arlimata, ačhavas o teljaripe e kancerosko.

Si nekobor šajimata palo skriningo. Testo e fecesosko palo arakhadipe e ratesko, savo naštik dićholpe e nađe jakhava, a savo si butimasko angluno nišani kaj si o polipo jal kancero ando thulo porr, majbutimaski si kasavi metoda.

Savora kola saven si katar 50 džike 74 berša trubunas te ćeren o testo palo garado rataripe ando feceso.

Bilačho testo inki či mothol kaj si o kancero. Ke kola ke save si bilačho testo bičhalenpe pe kolonoskopija, a sar te araćhelpe sostar si rataripe - bipharenasvalimasko polipo, kancerosko nasvalipe jal aver nasvalipe e thule porresko.
Te o testo naj nasvalimasko, palem kasavo testo palo garadino rataripe ando feceso ćerelpe pale duj berša.    

IMUNOHEMIJAKO TESTO PALO SIGUTNO ARAKHADIPE GARADINE RATESKO ANDO FECESO

Sigutno arakhadipe e kancerosko e thule porresko majbajraren o šajipe palo majbutipe e trajtosko e nasvalesko. Imunohemijako testo si jekh katar e testurja save ke saste manuša araćhel e garadine vurme e ratesko ando feceso sar anglune nišanija e nasvalimasko.  

Kava metodi dikhimasko e fecesosko si sigutno, bidukhavimasko thaj carra molimasko. Sa kava ćerel o manuš korkoro, ko ćher, a džikaj e rezultaturja tolmačil o sastarno.

E manuša ke save o testo si bilačhimasko bičhalenpe pe kolonoskopija, a sar te araćhelpe sostar si rataripe.

Inki majbut informacije:

1. Imunohemijako testo či araćhel o rat savo šaj te avel thodino ando feceso e saste manušesko.
2. Pašo rataripe andar o thulo porr, o rat ando feceso šaj te avel vi kana si šuljurja, o rat ande mutera jal nasvalipe e pipotako. Rataripe andar oprune kotora e digestivako sistemo (sar egz. kana si funačelo pe pipota tho dešudujepalconengo porr) ačhen garadine.
3. Naj sa e ratarimata andar o thulo porr nasvalimaske thaj tumorendar.
4. Ke manuša kaj si bilačho dikhipo e testosko pe jakh, trubulimasko si te ćerelpe e kolonoskopija.
5. O lačho negativako dihkipo e testosko či mothol kaj naj rataripe, majsigo kaj šaj avel povarekane vrjamako.
6. Ande sigutne faze e beningne arlimata e thule porresko  varekana či rataren, gajda kaj si trubulimasko te ćerelpe testosko rodipo pale manuša purane katar 50 džikaj 74 berša sa jekh dujto berš.
    

So si kolonoskopija?

Sar ćerelpe e kolonoskopija?

E kolonoskopija ćerel o sastarno e banđimaske trskicava thuli sar o naj thaj savi čhovel ando rektumo poloće ispidimava, a prdal e kamera savi si po anglunipe e trskicako dićhel sasto lundžaripe e thule porresko sa džiko teljaripe e sane porresko.

O dićhipo ćerelpe ande lačhe lačhardi ambulanta pale kolonoskopija. O nasvalo džikaj trajil o dićhipe majbut droma pašljol pe sting rig. Majsigo no so teljarelape e dićhimava e nasvaleske čhovelpe e suv ande vena te trubuja te denpe draba pale dukhavimata thaj infuzija. Sasto dićhipe trajil džike trjanda minuturja. Džikaj trajil o dićhipe ando thulo porr mećelpe o danfo, a so šaj te anel džiko phućipe jal spazmo ando ođi, so ćerel te vareko haćarelpe bilačhe thaj ladžavkane. O dićhipo si sar bidukhavimasko. 

Te o dićhipo ćerelpe ande anestezija, trubulimasko si te vareko avel e nasvaleja thaj te na halpe đes majanglal, sar ni godova đes kana si o dićhipo. Palo dićhipo po butipe nasvale šaj te han. Godova đes či trubul te bućarelpe.

So trubul majsigo te ćerelpe kana džalpe po dićhipo?

Te o dićhipo e porrengo avel lačhimasko, trubulimasko si te lačhe šilavenpe e porra.

O teljaripe palo dićhipo teljarel duj đesa majsigo kana motholpe kana si godova thaj majsigo e hamava. Sikavelpe te pajsarelpe po habe, sar egzamo o mas, e kašteske the barjaće bijanimata, humer thaj sar vi sa kova ande soste si e sumuncujra, kućina thaj sumbujra. Paše kava trubul pale harni vrjama te pelpe majbut litre paj ande savo si čhutino o drab palo šiladipe e porrengo.

Katar sa kava mothola tumenđe tumaro sastarno. Godova đes po dićhope na te halpe. Katar o pipe šaj te pelpe o pipe katar e phabaj, paj thaj nesave zumnja. O nasvalo šaj te pel peske rindoske draba, no numaj nesoske na, a save mothola tumenđe tumaro sastarno.

Sostar si e kolonoskopija maj lačho dićhipo e thule porresko?

E kolonoskopija si maj lačho dijagnostikako metodi dićhipasko e thule porresko, majsigo kaj del šajipe te majčačimava dićhelpe sasti andruni limenđi morćhi e thule porresko. Pašo dićhope, e kolonoskopija del šajipe te bidukhako fuljarenpe e polipurja, gajda kaj e kolonoskopija ande butimaske dićhimata si sar agorimaski thaj lačhi. Paše tumoreske arlimata, e dićhimava šaj te araćhenpe vi aver nasvalimata e porrengo. 

So si godova polipurja?

Polipurja si binasvalimaske inklistimata pe andruni morćhi e thule porresko. Ande lende e vrjamava šaj te ćerdolpe o nasvalimasko tumori. Majsigo, lengo arakhadipe  thaj čhindope vasno si te ačhadolpe o kancero e thule porresko.

E polipurja šaj te aven bare katar e kućin e prososko džike nekobor centimenturja. Sar vazda naštik motholpe so si  binasvalimasko, a so nasvalimasko tumori, trubul te ćerdolpe biopsija e poliposko. Po butipe polipurja kana ćerelpe e kolonoskopija, čhindonpe thaj inkalenpe, a pale godova bičhalenpe po patohistologijako dićhipe.   Katar o butipe e polipengo lelpe kotororro palo dićhipe (biopsija), a pale patohistologijaće dićhimata losarelape sar te čhinenpe thaj te fuljarenpe. E biopsija naj dukhadi. Te na nesosko polipo savo phare dićhelape hasavol, trubulimasko si te o porr majsigo no so dićhelape te avel lačhe šilado.

Čefal komplikacije šaj te anel e kolonoskopija

E komplikacije e kolonoskopijako naj butimaske. Nekobor komplikacije si o hvaripe tho pharadipe e porresko, a so šaj te anel džike hirurgijako suvipe, sar vi o rataripe džike savo avel pale biopsija thaj savo korkorro pestar ačhel.

Pale majbut informacije džan thaj pučen ande tumaro sastarimasko ćher